Франција го совлада Исланд со 31:22, го презеде врвот на табелата во групата Е и направи голем исчекор кон полуфиналето на 26. Светско првенство во ракомет во Германија и во Данска. „Триколорите“ ги одработија Исланѓаните како на тренинг, одлично влегоа во мечот, нанижаа 6 гола, а првиот го примија по 13 минути игра. „Викинзите“ успеаја до полувреме да се доближат на подносливи минус 4 (15:11), но составот на Дидие Динар додаде гас во продолжението за рутински триумф на крајот.
Валентин Порте и Мелвин Ричардсон постигнаа по пет гола за актуелниот светски првак колку и Елвар Орн Јонсон за Исланд. Голем придонес во убедливата победа имаше и голманот Венсан Жерар кој го заврши натпреварот со 14 интервенции.
Франција е лидер во групата Е со седум бода од чети меча, Германија е втора со пет бода од три меча, а трета е Хрватска со 4 бода. „Коцкестите“ попладнево искомпромитираа се што направија во прелиминарната фаза во Минхен, но и шансите за полуфинале по изненадувачкиот пораз од Бразил со 26:29. Хрватските ракометари сами се доведоа во ситуација да одат по потешкиот пат до големата четворка за што им требаат победи во дуелите со Германија и со Франција.
Нареден ривал на Хрватска е Германија (21 јануари, 20.30 ч.) по што ќе следува ден одмор, па мечот со Франција во среда (18 ч.).
Фаворитите се оправдаа во таква улога во групата Ф. Норвешка триумфира над Египет со 32:28 додека Унгарија беше подобра од Тунис со 26:21.
СП во ракомет (м) – главна фаза
Група Е
Исланд – Франција 22:31
Бразил – Хрватска 29:26
Табела: Франција 7 (4 меча), Германија 5 (3), Хрватска 4 (3), Шпанија 2 (3), Бразил 2 (3), Исланд 0 (4).
Двојки за понеделник (21 јануари): Шпанија – Бразил (18 ч.), Хрватска – Германија (20.30 ч.)
Група Ф
Норвешка – Египет 32:28
Унгарија – Тунис 26:21
Табела: Данска 6 (3 меча), Шведска 6 (3), Норвешка 4 (3), Унгарија 3 (4), Египет 1 (3), Тунис 0 (4).
Двојки за понеделник (21 јануари): Шведска – Норвешка (18 ч.), Египет – Данска (20.30 ч.)
Президент куп
За 13 место: Русија – Катар 28:34
За 15 место: Македонија – Чиле 32:30
За 17 место: Србија – Аргентина 28:30
За 19 место: Бахреин – Австрија 27:29
За 21 место: Кореја – Саудиска Арабија 26:27
За 23 место: Јапонија – Ангола 29:32