Македонската машка ракометна репрезентација со пораз стартуваше на Светското првенство за играчи до 19 години што од 6 до 18 август ќе се одржи во Скопје. Во меч од првото коло во групата Ц, избраниците на Данило Брестовац загубија од Аргентина со 20:23.

Домашната селекција одигра две различни полувремиња во СЦ „Борис Трајковски“. Го доби првото со четири разлика (13:9), но падна во второто во кое постигна само седум гола, а прими двојно повеќе. Младите Аргентинци стигнаа до егал во 56. минута меѓутоа не запреа ниту беа запрени. Во последните четири минути, „сино-белите“ реализираа три гола за разлика од македонските ракометари кои не успеаја ниту еднаш да го совладаат Хуан Игнацио Вилјареал, па дури и од линијата за седум метри.

Најефикасен во тимот на Брестовац беше Ненад Костески со шест гола, Мартин Серафимов даде четири, а Михајло Младеновиќ три. Прв стрелец на средбата беше аргентинскиот репрезентативец, Сантијаго Гарсија Барсело со седум погодоци.

Следува ден одмор во групата Ц, а наредниот натпревар за македонските ракометари е во четврток против Нигерија.

СП во ракомет (У19) во машка конкуренција

Група А, 1 коло

Шпанија – Саудиска Арабија 36:21

Хрватска – Норвешка 32:22

Словенија – Чиле 35:30

Група Б, 1 коло

Франција – Канада 44:16

Унгарија – Тајван 38:20

Шведска – Египет 29:32

Група Ц, 1 коло

Бахреин – Нигерија 36:28

Данска – Јапонија 30:23

С. Македонија – Аргентина 20:23

Група Д, 1 коло

Германија – Португалија 26:33

Србија – Бразил 30:24

Исланд – Тунис 25:20