Македонија го врза вториот пораз на Светското младинско првенство во ракомет во Алжир. По Тунис, подобра од „црвено-жолтите“ беше и Шпанија која славеше со убедливи 36:25 во рамки на четвртото коло во групата Ц што за „фуријата“ значи „бетонирање“ на лидерската позиција на табелата, а за составот на Илија Темелковски насочување на директен дуел со Бразил за место во плеј-офот.
Шпанците воопшто немаа проблеми при запис на четвртиот триумф на шампионатот во исто толку настапи додека македонските ракометари делуваа како разнишани по загубата од нивните туниски врсници. Потврда за тоа и фактот дека сите 14 играчи во ростерот на Исидоро Мартинез постигнаа голови. Најистакнат меѓу нив беше Даниел Душебаев со седум, по четири за Македонија реализираа Талески и Кузмановски.
Фаворитот веднаш ја презеде работата во свои раце и до петтата минута имаше водство со 4:1. Воведното темпо го задржа и во продолжението за серија од 12:2 во периодот меѓу десеттата и 27 минута од првиот дел за високи плус 11 (17:6) по што натпреварувачкиот момент испари.
Ако двете селекции имаа нешто заедничко во меѓусебниот судир, тоа е слабата вечер на голманските тандеми. Томовски остана без интервенција додека Даниловски забележа четири. Ледо фати два удара на македонските репрезентативци.
Македонија денеска (19 ч.) на првенството ќе игра со Бразил и потребен е бод за и двете репрезентации да продолжат понатаму. Поразената ќе остане без разигрување за највисок пласман од причина што Русија е апсолутен фаворит во натпреварот со Буркина Фасо. „Зборнаја“ во пресрет на последното коло има три бода или еден помалку од „црвено-жолтите“ и јужноамериканскиот претставник.
Македонија – Шпанија 25:36 (8:18)
Спортска сала: „Омниспорт Хацене Харча“ во Алжир. Гледачи: 1.000. Судии: Свавар Петурсон и Арнар Сигурјонсон (двајцата од Исланд).
Македонија: Томовски, Даниловски (4 одбрани), Лазаревски, Димитриоски 1, Нелоски 1, Танкоски 3, Велковски 3, Шилегов 3, Петровски 1, Талески 4, Кузмановски 4, Крстевски, Џонов, Палевски 3, Арсеновски 2. Селектор: Илија Темелковски.
Седмерци: 5/7. Исклучувања: 4 минути.
Шпанија: Гонзалез, Ледо (2 одбрани), Маркез 3, Д. Душебаев 7, Базан 6, Нието 1, Оливер 1, Рио Иглезијас 2, Одриозола 2, Де ла Пења 1, Лопез 1, Кастро 2, Д. Фернандез 1, Фолкес 4, Гомез 3, Х. Фернандез 2. Селектор: Исидоро Мартинез.
Седмерци: 0/1. Исклучувања: 12 минути.
СП во ракомет (У21) – Алжир
Група А, 4 коло
Фарски Острови – Германија 21:29
Норвешка – Чиле 41:16
Јужна Кореја – Унгарија 30:40
Табела: Германија 8, Норвешка 8, Унгарија 4, Фарски Острови 4, Јужна Кореја 0, Чиле 0.
Група Ц, 4 коло
Македонија – Шпанија 25:36
Тунис – Русија 29:29
Буркина Фасо – Бразил 17:37
Табела: Шпанија 8, Тунис 5, Македонија 4, Бразил 4, Русија 3, Буркина Фасо 0.