Норвешка ѝ одржа час по модерен ракомет на Русија во последниот четвртфинален натпревар на Светското првенство за жени чиј домаќин е Германија. Бранителот на титулата ја декласира „зборнаја“ со 34:17 и во реприза од полуфиналето на претходниот мундијал ќе игра против Холандија.
Победникот беше решен уште во првото полувреме што Норвежанките го добија со 15:8 иако Русинките влегоа како единствени непоразени на турнирот, но малку кој веруваше дека можат да ги изненадат актуелните континентални и планетарни шампионки. Сепак, малку кој веруваше дека и тие така лесно и убедливо ќе се пробијат до мечевите за распределба на медалите.
Морк со девет гола и Офтендал со осум беа најефикасни во победничката селекција, Кочетова беше прв стрелец кај Русинките со пет погодоци.
Холандија претходно ја совлада Чешка со 30:26 во натпревар што донесе многу возбудувања. Холанѓанките тргнаа силно и по првите десетина минути имаа 7:1, но наредните десет им припадна на чешките ракометарки кои со голот на Лузумова во 21 минута се доближија на минус 1 (10:9), негатива што ја одржаа до паузата (17:16).
Сликата на теренот не се промени ниту во продолжение на средбата. Се играше, речиси, гол за гол. Холандија, сепак, успеа да се одлепи на плус 3 во еден момент на што Чешка возврати со идентична мера за 24:24. Со тој резултат се влезе во завршните десет минути во кои девојките во портокалово-црна комбинација беа помирни и попрецизни за конечен триумф и полуфинале.
СП во ракомет (ж)/четврт-финале
Норвешка – Русија 34:17
Холандија – Чешка 30:26
Франција – Црна Гора 25:22
Шведска – Данска 26:23
Двојки за полуфинале
Холандија – Норвешка (петок, 17.30 ч.)
Шведска – Франција (петок, 20.45 ч.)