Генералниот секретар на СДСМ, Оливер Спасовски, денес повторно го повика претседателот Ѓорге Иванов да го додели мандатот на парламентарното мнозинство кое му достави 67 пратенички гласови за Зоран Заев да да ја формира новата реформска Влада.
– Иванов не може да го спаси Груевски преку кршење на Уставот. Груевски не може да се спаси од одговорност преку провоцирање насилство и создавање поделби помеѓу граѓаните. Граѓаните се длабоко загрижени. Домашната и меѓународната јавност испратија многу сериозни предупредувања. Груевски и Иванов да не си играат со оган и да не предизвикуваат атмосфера на омраза и конфликт во Македонија, порача Спасовски.
Како што вели тој граѓаните го избрале концептот едно општество за сите и не сакаат поделби.
– Сакаат повисока минимална плата и зголемување на просечната плата, квалитетно образование и здравство, држава во служба на граѓаните и правда за сите. Промените започнаа и ниту Груевски, ниту Иванов нема да ги спречат, потенцираше тој.
Коментирајќи го писмото кое Иванов денеска го испрати до најважните претставници на меѓународната заедница, Спасовски рече дека Претседателот го прекршил Уставот уште кога мандатот му го дал на Груевски без да има потврда за мнозинство а Меѓународната заедница до која Иванов испрати писмо постојано укажува дека на Македонија е неопходно што поскоро да има Влада која функционира и која ќе работи на реформите.
СДСМ очекува Иванов да се откаже од заштитата на една политичка структура, да се предомисли и да застане на страната на граѓаните на Република Македонија.
Истовремено Спасовски ја искористи можноста да упати прашање до Претседателот на Македонија – зошто не бил загрижен во моментите кога го додели мандатот на Никола Груевски, кога исто така постоеше албанската платформа за која Груевски се согласил.
Одговарајќи на новинарско прашање, зошто СДСМ не побара да се свика Собранието, да се избере претседател на Собранието и да се распишат локални избори, Спасовски одговори дека тие работат на варијанти но до Иванов било да се вразуми и да го даде мандатот со тоа што ќе ги исполни своите уставни овластувања.
– Ова претставува директно кршење на Уставот, рушење на уставниот поредок и токму заради тоа и денешната прес конференција и повикот навистина Иванов да направи се, да помогне Македонија да излезе од оваа криза. Изборот на Парламентот и сите други работи којшто претходат, сигурно дека мора да се случат меѓутоа најважно од се е Македонија да добие што е можно побрзо Влада, повтори генералниот секретар на СДСМ.