Mинавме низ многу тешки моменти и премрежја во изминатите 27 години. Со мудро лидерство и разумни политики, сплотени и посветени успеавме да ги надминеме сите пречки и премрежја. Сите успеси што ги постигнавме по членството во Обединетите Нации (ОН) беа благодарение на нашата посветена работа, на заедничкиот труд и обединетоста на народот, напиша премиерот Оливер Спасовски на неговиот Фејсбук профил по повод одбележувањето на 27 години од приемот на земјава во Организацијата на обединетите нации.
„Да останеме обединети, силни и посветени и во овие тешки моменти. И ова ќе мине. Да веруваме во нашите капацитети и способности. Да ја направиме опасноста од коронавирусот да биде триумф на нашето знаење, на професионалноста на нашите институции и на солидарноста на нашиот народ“, порачува Спасовски.
Денес, 8 април, се одбележуваат 27 години од приемот на нашата држава во Организацијата на Обединети Нации (ООН). Во 1993 година, земјава беше примена во ОН под привремената референца „Поранешна Југословенска Република Македонија“. Денес одбележуваме 27 години полноправно членство во ОН како Република Северна Македонија.
Членството во ОН помогна за етаблирање на нашата држава на меѓународна сцена, како самостојна и независна држава, и како еднаков дел од меѓународното семејство на народи.
Во приемниот говор во ОН, Претседателот Глигоров ги постави темелите на нашите вредности и ги зацрта нашите најважни приоритети во надворешната политика, на кој и денес сме посветени и кои неуморно ги реализираме.
Претседателот Глигоров истакна дека со самостојноста и членството во ОН „се круниса повеќевековниот стремеж на македонскиот народ и неговата 130 годишна борба за слобода и независна држава“. Воедно, кажа и дека „највисока цел претставува остварувањето на човековите права и особено на правата на националностите и етничките групи што живеат во Република Македонија. Таа денес е татковина на македонскиот народ, на Албанците, на Турците, на Србите, на Ромите, на Власите и на претставниците на други националности.
„Ги затворивме сите прашања со соседите. Немаме отворени прашања и единствена земја сме на Балканот што може да го каже тоа. Воедно, поставивме пример за другите дека со дипломатија и дијалог, со разбирање и толеранција, можат да се решат најгорливите прашања и да се добијат нови пријатели и сојузници. Ние активно ја поддржуваме и развиваме регионалната соработка за да биде во функција на мирот, стабилноста и просперитетот на сите граѓани во нашиот регион“, вели премиерот Спасовски.
Темелите на нашата надворешна политика се цврсти и непроменети, откако беа посочени од претседателот Глигоров на 8 април во 1993 година при приемот во ОН, и се базираат на Повелбата на Обединетите нации – јакнење на меѓународниот мир и безбедност, развивање на економската соработка и заштита на човековите права, како предуслови за побезбеден и праведен свет за сите”.
Како што тогаш кажа претседателот Глигоров, „Република Македонија сака и подготвена е да го даде својот придонес во решавање на меѓународните конфликти во согласност со резолуциите на Советот за безбедност, во интерес на мирот и на безбедноста“. Денес, земјава е 30. земја членка на НАТО, рамноправно ќе дава придонес со сојузниците во најмоќната политичка и воена алијанса во историјата на човештвото за одржување на безбедноста и мирот во светот.
Воедно, Глигоров ја посочи и втората цел – „Република Македонија како европска држава се стреми да стане член на Заедницата на европските народи“. Во март оваа година, ЕУ донесе позитивна одлука за Република Северна Македонија да ги започне преговорите за членство во Унијата.