Министерот за внатрешни работи, Оливер Спасовски негира дека имал редовни контакти со обвинетиот Бојан Јовановски во случајот „Рекет“.
„Имавме два-три службени контакти што се однесуваа на пријави за упад во електронскиот систем во телевизијата и за тоа беа остварени средби со директорот на Бирото за јавна безбедност. Апсолутно не станува збор за било какви други контакти, ниту пак за разговор со него или со било кој друг вклучен во криминални активности“, нагласи Спасовски.
Ваков одговор даде првиот човек на МВР на новинарско прашање поврзано со сведочењето на Ана Камчева во случајот „Рекет“ дека тој бил редовно во контакт со Јовановски. Таа на едно од досегашните рочишта рече дека поранешната специјална обвинителка Катица Јанева побарала повлекување на гаранцијата од 14 милиони евра за замена на мерката притвор со куќен притвор за нејзиниот сопруг. За тоа, како што кажа, го информирала Орце Камчев и му ставила до знаење дека ќе го пријави случајот.
Тоа било причина, како што истакна во судницата во Кривичниот суд, да оствари средба со директорот на Управата за безбедност и контраразузнавање, Горан Николовски на кого му навестила дека ќе пријави оти е жртва на рекет.
„Ме праша зошто немам доверба во институциите. На тоа му набројав со кого сè е близок, меѓу кои и со министерот за внатрешни работи“, кажа Камчева во сведочењето за „Рекет“.
Пред Камчева, во случајот „Рекет“ сведочеше и Орце Камчев. Рочиштата против првообвинетиот Бојан Јовановски и второобвинетата Катица Јанева почнаа на 3 декември. Третообвинетиот Зоран Милески-Кичеец ја призна вината и доби тригодишна казна затвор. Наредното сослушување на сведоци е закажано на 23 декември.