Постапката за екстрадиција на поранешните началници на УБК Горан Грујевски и Никола Бошкоски ја води Министерството за правда со меѓународна правна помош со Министерството за правда на Грција, изјави денеска министерот за внатрешни работи Оливер Спасовски на меѓународната конференција „Приватна јавна безбедност – соработка и партнерство“ на Факултетот за безбедност во Скопје.
– Министерството за внатрешни работи имаше обврска да соработува со Министерството во Грција се до приведување на овие лица, истакна Спасовски.
Во однос на логистичката поддршка на обвинетите Грујевски и Бошкоски во МВР, Спасовски рече дека имаат многу податоци и дека заедно работат со Обвинителството, но оти информациите не се за споделување со јавноста.
Прашан дали постои можност Грујевски и Бошкоски да се „пазарат“ со грчките служби во однос на споделување на информации за она што го работеле во изминатите години во УБК, Спасовски рече дека нема ниедна информација што досега не е поделена со јавноста со оглед на тоа што во јавноста преку т.н. бомби имаше можност да ги слушне разговорите за нивната работа.
На двајцата екс разузнавачи на УБК, Горан Грујевски и Никола Бошковски во Солун ќе им се суди на 1 декември.
Тие вторникот седнаа на обвинителна клупа во судот во Солун, но со часови чекаа на судски преведувач. Тие во судницата беа со адвокати од Грција и еден од Македонија.
Нив им се суди за лажни пасоши, а во судницата освен нив им се суди и на мигранти кои немаат правен статус во Грција.
Кривичен совет од одделението за организиран криминал во Кривичниот суд во Скопје работи на барањето за екстрадиција на бегалците од Грција.Судот има 40 дена да ја подготви документацијата колку што им е доделен и екстрадиционен притвор на двајцата екс разузнавачи кои беа уапсени н аеродромот во Солун минатата недела. За експертите битна е и одлуката на тамошниот суд за кривичното дело- фалсификуваните бугарски пасоши, за што најверојатно ќе добијат и казна.
Минатата недела Дојче веле, повикувајќи се на функционер на грчкото Министерство за јавен ред и заштита на граѓаните кој инсистирал на анонимност затоа што не смее јавно да го коментира случајот, објави дека на крајот на ноември или во првите недели на декември годинава може да се очекува екстрадицијата на двајцата македонски државјани кои во средата вечер беа уапсени на аеродромот во Солун, во обид да ја напуштат Грција. Дотогаш, двајцата обвинети ќе бидат во екстрадиционен притвор.
Грујевски и Бошковски – клучните обвинети`во „Таргет“ и „Тврдина“