Премиерот Оливер Спасовски смета дека здравствениот систем е подготвен да се справи со најавите за поголем број заболени од коронавирусот, но апелира дека за тоа е потребна и поддршка од граѓаните кои треба да ги почитуваат сите препораки и рестриктивни мерки, а со тоа да спречат и помасовно ширење на вирусот. Тој не исклучува можност за воведување нови дополнителни рестриктивни мерки, ако за тоа добијат препораки од Комисијата за заразни болести.
„Сите ресурси ги насочивме кон здравствениот систем во овој период, затоа што сметаме дека тој треба да остане стабилен во борбата со коронавирусот. Во овој период докажавме дека здравствениот систем навистина функционира. Се направија сите подготовки за да може да издржи тоа што се најавува и што ќе се случува, а се случува во сите земји. Но, колку повеќе луѓето се придржуваат кон правилата, се почитува социјалната дистанца и се намали движењето и секој од нас остане дома во наредниот период, директно се помага и на здравствениот систем“, рече Спасовски во разговор за „Слободна ТВ“.
Тој додаде дека во целиот период на борба со коронавирусот здравствените работници се на прва борбена линија, дека даваат максимум со елан и енергија за да им се помогне на сите граѓани.
„Очекувам сите заедно да ја добиеме оваа битка“, рече Спасовки.
Во однос на носењето на одлуките и рестриктивни мерки, тој потенцира дека како Влада се раководат по предлози на стручни луѓе од здравството, на епидемиолозите и што мислат дека треба да се направи и за здравствениот систем и за граѓаните.
„Очекувам денеска да разговараме во однос на дополнителни мерки кои би биле воспоставени како рестриктивни мерки од помош во целата состојба и ако има препорака од комисијата, тоа би го направиле можеби на денешна седница на Влада“, рече премиерот Спасовски.
Тој истакна дека во моментот не сака да размислува за нападите од опозицијата, кои, како што рече, се фокусирани на освојување на политички поени. За нас, рече, во моментот приоритет е здравјето на граѓаните и фокусирани сме на тоа што треба да се направи за нивна заштита.