Интернационалниот олимписки комитет (ИОК) ја поздрави можноста за учество на спортистите од Северна Кореја на претстојните зимски олимписки игри во јужнокорејски Пјонгчанг и порача дека поканата останува за отворена.
Од седиштето на организацијата во Лозана изразуваат огромна поддршка и за взаемната намера на владите на двете земји за отпочнување на директни преговори за присуство на Севернокорејците на настанот од 9 до 25 февруари. Паралелно со тоа ИОК ќе продолжи со интензивни контакти со националниот комитет на Северна Кореја.
Во новогодишно обраќање, севернокорејскиот лидер Ким Џон Ун, меѓудругото, истакна дека Игрите во Пјонгчанг ќе бидат добра прилика за промоција на неговата земја, за искажување на национална гордост и со желба истите да бидат успешни.
Градот домаќин на зимската олимпијада е на само 80 километри од највооружената граница во светот што е демилитаризирана зона меѓу Северна и Јужна Кореја.