Денеска ќе бидат погребани четири од осумте деца кои во пукање во училиштето „Владислав Рибникар“ во Белград ги уби разулавениот Коста К.(13).
За време на викендот беа погребани 13 жртви од двата масакри што ја зацрнија Србија. Четворица ученици и училишниот чувар Драган Влаховиќ во саботата се испратени на вечното почивалиште во Белград. Во Мали Орашје и Младеновац беа погребани осум лица кои беа брутално ликвидирани од Урош Б. во крвавиот пир што траеше со часови, меѓу нив и полицаецот Милан П., неговата сестра Кристина и неговиот пријател Далибор Т. За два дена 17 лица беа убиени во Србија.
Сите ученици во Србија од денеска се враќаат на редовна настава, освен основното училиште во Врачар, местото на големата трагедија. Владините мерки стапуваат на сила, а утрово полицајци се распоредени во сите 1.800 училишта во земјава. Тие ќе бидат присутни на сите јавни места каде што се собираат голем број граѓани, пишува Блиц.рс.
Во сите училишта во Србија од денеска од 8 часот до завршување на наставата ќе бидат присутни полициски службеници кои превентивно ќе делуваат, изјави државниот секретар во МВР Данило Стевандиќ.
Ангажирањето на дополнителни 1.200 полицајци, вели тој, ќе обезбеди секое училиште да има полицаец кој ќе се грижи за безбедноста на учениците и вработените.
На влезот во основното училиште „Владислав Рибникар“ има четворица полицајци, а вратата од училиштето ја отвораат само вработените. Настава нема, а од денеска ќе се организира продолжен престој за учениците од пониските одделенија, од прво до четврто одделение. Наставата за сите ученици треба да започне во среда на 10 мај, седми ден од невидената трагедија во училиштата во Србија.
На деветте пациенти кои се здобија со тешки телесни повреди во масовното пукање во Младеновац, им е укажана помош во Клиничкиот центар на Србија, а четворица се извадени од апарати за дишење и се во подобра здравствена состојба, еден од пациентите дури е испратен на домашно лекување.
Двајца пациенти се уште се во тешка состојба, едниот е со тешки повреди на црниот дроб, бубрезите и колената, додека едно девојче е со тешки повреди на главата и очите.
Министерството за внатрешни работи на Србија ги повика граѓаните кои поседуваат нерегистрирано оружје од денеска, 8 мај, до 8 јуни годинава, да го предадат во најблиската полициска станица.
Во овој период граѓаните кои ќе го предадат нерегистрираното оружје нема да одговараат ниту кривично, ниту ќе сносат некакви последици и не мора да го докажуваат потеклото на оружјето.
Извор: Н1