Во последните 24 часа во Србија се тестирани 21.876 лица од кои 5.224 добиле позитивни резултати, додека во истовреме починале 19 пациенти. На респиратори во болниците ширум земјата се приклучени вкупно 79 граѓани.
Српските здравствени власти вчера пријавија 2.765 случаи од 14.062 тестирани лица и 27 смртни исходи. Вчерашниот ден, колку за илустрација, донесе зголемување за 125 отсто на бројот на нови случаи во однос на изминатиот понеделник, а денешниот е уште поголем на неделно ниво.
Омикрон апсолутно доминира во Србија, само што тоа не е реално согледано низ тестирањата. Нѝ претстојат петцифрени броеви на инфицирани лица на дневно ниво, а дали ќе биде над 20.000 или 30.000 официјално не знам и не сум сигурен дека ќе можеме толку да детектираме. Најлоша ќе биде општествената експлозија поврзана со ковид-19, бидејќи ќе имаме стотина илјади заболени кои ќе отсуствуваат од работа. Буквално пола население на Србија ќе биде на боледување во јануари, изјави проф. др. Радмило Јанковиќ, заменик директор на УКЦ во Ниш.
Со неговиот став се согласува и командантот на ковид болницата „Карабурма“, др. Иво Удовичиќ кој наведува дека огромен скок на новозаболени со коронавирусот може да се очекува во наредните седум до 10 дена, бидејќи ќе дојдат за наплата организираните дочеци на Нова година на плоштадите, но и прославите во ресторани, кафулиња и ски-центри.