Премиерот Зоран Заев, во рамки на Самитот на ЕУ за Западен Балкан, денеска се сретна со германската канцеларка Ангела Меркел.
Како што соопшти прес службата на Владата, премиерот Заев истакнал дека големата поддршка на граѓаните за аспирациите на земјата за членство во ЕУ и НАТО говори дека земјата нема друга алтернатива и дека тоа потврдува дека граѓаните на Република Македонија делат исти европски вредности и дека заслужуваат индивидуална проценка за напредокот врз основа на постигнатото. Тој очекува поддршка од Германија за Македонија да добие датум за преговори на претстојниот Самит на Европскиот Совет во јуни и на поддршката на канцеларката Меркел во разговорите со останатите премиери на земјите членки на ЕУ.
Премиерот Заев посебно ја издвоил како особено значајна за регионот иницијативата Берлински процес, од која произлегуваат голем број проекти за економско и останато поврзување на земјите од Западен Балкан, кои, истовремено, ги подигнуваат капацитетие на земјите од регионот во приближувањето на нивните стандарди до оние на ЕУ.
Премиерот Заев и канцеларката Меркел разговарале и за можните последици доколку регионот и Република Македонија не ги добијат заслужените признанија и доколку се успорат процесите за интегрирање на земјите од Западен Балкан во ЕУ. Такво сценарио ќе ги закочи реформските процеси, ќе ги охрабри ретроградните политички сили и ќе отвори простор за инволвирање трети страни што може да предизвика нарушување на стабилноста.