Неверојатна среќа во несреќа имаше шпанскиот голман Родриго Коралес во последниот тренинг на шпанската репрезентација пред утрешниот дуел со Франција на стартот од главната фаза на Светското ракометно првенство во Германија и во Данска. Додека селекторот Жорди Рибера ги правеше завршните подготовки за „триколорите“ во Ланксес арена“ во Келн, врз колегата на Перес де Варгас падна ЛЕД реклама.
По укажаната медицинска помош во салата, Коралес веднаш беше префрлен во болница и по деталните медицински прегледи е утврдено дека не е потешко повреден.
Падот на тешката ЛЕД реклама предизвика силна болка кај голманот и констатирано е дека ја одрала кожата на неговата лева нога од бутниот мускул до скочниот зглоб и направи голем хематом меѓутоа за среќа нема оштетување на коските.
Хуан Хозе Муњоз Бенито, лекар на репрезентацијата на Шпанија, истална дека Коралес не е во можност да им помогне на соиграчите во натпреварот со Франција.
„Чувствува голема болка и не може да игра“, рече Бенито.
Дуелот меѓу Шпанија и Франција е во сабота (19 јануари) во Келн со почеток во 18 часот.