Српскиот министер за внатрешни работи Братислав Гашиќ, чие разрешување веќе два месеца бараат учесниците на граѓанските протести „Србија против насилството“ поради објективна одговорност за двата масакра извршени на почетокот на мај, ќе остане на функцијата, одлучи денеска владејачкото мнозинство во српското Собрание.
Барањето за смена на Гашиќ беше официјално поднесено до Парламентот од 61 пратеник на опозицијата, која повика на протести против насилството во јавниот простор, политиката и медиумите, поттикнати од оружените напади во основно училиште во Белград и две села. во околината на Белград, кога на 3 и 4 мај беа убиени 17 лица, главно млади луѓе, а 20 од нив беа ранети. Подоцна, уште двајца им подлегнаа на повредите во белградските болници.
По расправата за одговорноста и барањето за разрешување на министерот Гашиќ, која почна на 15 јуни, неговото останување на функцијата денеска го поддржаа 146 претставници на владејачкото мнозинство, додека седуммина од вкупно 250 не гласаа.
Исходот од денешното изјаснување за објективната одговорност на Гашиќ за двете масовни убиства можеше да се претпостави откако претходно, во неколку јавни говори, српскиот претседател и до неодамна шеф на владејачката Српска напредна партија, Александар Вучиќ, порача дека не го дава Гашиќ и со тоа ја упати партиската определба на претставниците на владејачкото мнозинство.
Претставниците на опозициските партии, кои повикаа на протестите „Србија против насилството“, за време на масовните собири на кои излегоа десетици илјади луѓе на улиците на Белград и во дваесет градови низ земјата, истакнаа дека барањата на демонстрантите мора да се исполнат и дека „нема да има отстапки“ околу тоа.
Демонстрантите бараат разрешување на министерот за внатрешни работи и првиот човек на разузнавачката агенција БИА, како и разрешување на Советот на Националниот регулатор за електронски медиуми (РЕМ) и раководството на јавната телевизија РТС.
На листата на барања е и затворање на провладините таблоиди кои пропагираат и поттикнуваат насилство, омраза и неморал, како и одземање на националните фреквенции од две телевизиски станици со национална фреквенција и укинување на реалните шоу програми кои промовираат насилство.
Засега нема индикации што ќе биде или би можело да биде одговор на опозицијата и демонстрантите на денешната одлука на власта да гласа во Парламентот за заштита на министерот за внатрешни работи Братислав Гашиќ.
Г. Т.