Нема можност за свикување на распуштениот парламентарен состав. Собранието може да се врати само по следните избори. Ова го е став на претседателот на Парламентот, Талат Џафери, кој го изнесе неколку дена по иницијативата на СДСМ за свикување итна седница за потврдување на одлуките на претседателот на државата, Стево Пендаровски за прогласување на вонредна состојба поради пандемијата со ковид-19 која истекува на 16 мај.
Џафери завчера во емисијата „Клик Плус“ на ТВ 21 рече дека секој друг начин за заседавање на Собранието, освен по избори, е обид за пуч. Тврди дека врз него се вршел притисок за повторно свикување на пратениците и заседавање на Парламентот, но, како што нагласува, „со Собранието е веќе завршено“.
„На 16 февруари секој пратеник гласаше за престанок на мандатот. Собранието ќе се собере по наредните избори“, вели собранискиот спикер, коментирајќи ја иницијативата за повторно свикување на законодавниот дом.
Пратениците од СДСМ, пак, вчера напоменаа дека ќе го почитуваат ставот на претседателот на Собранието, Талат Џафери за несвикување итна седница за потврдување на одлуките за вонредна состојба поради коронавирусот. Но, бараат одговор на нивното барање што е формално доставено до Собранието.
„Како и досега така и од сега, ќе го почитуваме во целост ставот на претседателот на Собранието, но ние сметаме дека како пратеници најмалку што треба да се случи, односно заслужуваме да добиеме одговор од претседателот на Собранието на писменото барање што е формално доставено, а не да добиваме одговори преку медиумите“, рече на прес-конференција Снежана Калеска Ванчева.
Според неа, легитимното право на пратениците, согласно Устав и Деловник на Собранието, не може да биде толкувано како пуч.
„Легитимно, демократски и согласно Деловникот и Уставот, ние како пратеници поднесовме иницијатива онака како што налагаат прописите, до претседателот на Собранието за свикување на итна седница. Нашиот став е непроменет и ние, имајќи ја предвид целокупната ситуација, сметаме дека е демократски и апсолутно корисно, Собранието да биде свикано и да ги потврди одлуките за времената состојба и тоа е всушност во насока на демократизација и поделбата на власта и добро е да знаат, добро е за граѓаните, за општеството за државата дека на располагање имаат уште еден механизам за контрола над извршната власт“, рече Калеска Ванчева.
За опозициската ВМРО-ДПМНЕ, пак, Собранието не може повторно да заседава затоа што е распуштено, а по ова прашање Уставот е јасен.
„Јасни се одредбите во македонскиот Устав, како и позитивните законски акти, така што еднаш распуштено Собрание не може да се врати и да заседава“, изјави минатата недела потпретседателот на партијата, Александар Николоски, а вчера се огласи и лидерот на ВМРО -ДПМНЕ, Христијан Мицкоски, кој рече дека „за неговата партија сега не се приоритет предвремените избори, туку надминување на состојбата со коронавирусот“.
„Овој состав на Парламентот е поранешен и мандатот на пратениците со неговото распуштање е завршен. Тие го вратија легитимитетот назад, кај граѓаните. Единствен што може да ја наполни салата во Собранието е народот. Не може ниту Зоран Заев, ниту група на пратеници да се обидуваат да го кршат Уставот“, рече вчера лидерот на ВМРО-ДПМНЕ Христијан Мицкоски.
Минатата недела пратеници на СДСМ поддржани со потписи на нивни колеги од НСДП, ЛДП, Алијансата на Албанците, ДПА, Беса, Алтернатива и пратеници од независната пратеничка група на ВМРО-ДПМНЕ, до Собранието поднесоа барање за свикување итна седница за да се потврдат одлуките за прогласување вонредна состојба поради пандемијата со ковид-19 од страна на претседателот на државата.