Македонскиот фудбалски репрезентативец Стефан Ристовски доби нов тренер. Нов тренер на Спортинг е Синиша Михајловиќ, објави португалскиот гигант од Лисабон. Српскиот тренер потпиша тригодишен договор со „зелено-белите“ од стадионот „Жозе Алваладе“.

Една од неговите задачи ќе биде шампионската титула во Лига Примеира во која сезоната 2017/18 ја заврши зад Порто и Бенфика, но и смирување на тензиите во клубот по судирот на играчите со претседателот Бруно де Карвалјо.

Удел во компликуваната состојба во Спортинг Лисабон имаат и навивачите кои во финишот на последното издание на шампионатот физички ги нападнаа фудбалерите по загубената битка за титулата. Немилите сцени резултираа со оставка на тренерот Жорж Жезус, а дел од колегите на Ристовски побараа раскин на соработката.

Михајловиќ е без ангажман во последните шест месеци по отказот што го доби во Торино во јануари оваа година. Претходно ги водеше Болоња (2008-2009 година), Катанија (2009-2010), Фиорентина (2010-2011), Сампдорија (2013-2015), Милан (2015-2016) и Торино (2016-2018) во Серија А, а еден период мина и како селектор на фудбалската репрезентација на Србија (2012-2013).