Првата група бегалци од Авганистан пристигна во Скопје. Во авионот на „Kam Air беа вкупно 149 граѓани на Авганистан кои преку Грузија слетаа во Македонија. Носеа торби, ранци, куфери, а некои од нив ги држеа своите деца во раце. Пет жени се бремени, а една од нив може да се породи во секој момент.

Дете, жена и маж се првите граѓани на Авганистан кои стапнаа на македонско тло. Тие беа приоритетни патници, бидејќи жената е во 39-тата недела од бременоста и со возило на брзата помош беше однесена на Клиниката за гинекологија во Скопје. Таа во Скопје пристигна со нејзиниот син и брат.

– Може во секој момент да се породи. Во моментот немаме знаци на породување при извршениот преглед од страна на докторката… Има уште четири трудници колку што сум јас информирана во моментов, изјави началничка на Итната медицинска помош, Милица Бубало.

Граѓаните на Авганистан, преку Грузија пристигнаа во земјава. Тие имаа солзи радосници и полни раце торби, куфери, носеа ранци, а некои во рацете ги држеа своите деца. Нивниот прв контакт беше со Црвениот крст, а веднаш потоа беа префрлени во автобуси и се упатија кон хотелите во близина на Скопје, каде ќе им се вршат здравствените проверки. Ќе им се направи ПЦР тест, а во случај некој да е позитивен ќе биде 14 дена во изолација. Здравствените власти ќе им понудат и вакцини на граѓаните кои ќе изразат желба за имунизација.

Авганистанците што пристигнаа во Скопје работат или соработуваат со меѓународната организација Отворено владино партнерство (Open Government Partnership – OGP) каде што земјава е членка. Нив ги пречека министерот за надворешни работи, Бујар Османи, заменик амбасадорот на САД во земјава и советници од премиерскиот Кабинет.

– Солидарноста којашто ја најавуваме неколку денена денеска веќе ја демонстираме на дело. И денеска овозможуваме топло добредојде на оние на коишто им е најпотребно, изјави министерот Османи.

Авганистанците во земјава се со статус на привремен престој од 90 дена. По три месеца тие ќе треба да заминат во друга земја или во САД. Нивните конечни дестинации ќе се знаат наредните денови, најави министерот Османи. Засега нема најава за нова група бегалци од Авганистан.

– Ние дадовме согласност досега за 750 граѓани… Во постојана координација сме со партнерските земји. Ја следиме состојбата на самиот аеродром и како ќе се појават услови за да излезе следната група којашто е најавена и потврдена, тогаш ние се разбира дека ќе бидеме спремни на ист ваков начин достоинствено да го пречекаме, рече Османи.

Не се знае дали во земјава ќе пристигнат сите 750 граѓани на Авганистан, чии список е испратен во Владата. Причина за ова се состојбите во Кабул. Инаку, 31 август е последниот ден за евакуација на граѓаните на Авганистан и денот кога се повлекува американската војска. Од утре раководството на аеродромот во Кабул го преземаат Талибанците.

(Видео): Вечерва во Скопје пристигна првата група бегалци од Авганистан