Published: Saturday, July 3, 2021 12:13
Од 12 јули до 20 август, Охрид ќе диши во духот на 61-то издание на најголемиот и најреномиран Фестивал „Охридско лето“. На сцената ќе продефилираат над 500 уметници од 18 земји, а програмата вклучува врвни концерти со светски познати имиња, македонски уметници со светска слава, театри и повеќе национални оркестри.
– Гордост, но и голема одговорност, е да се зборува за врвна програма во време на ковид-пандемија кога секој настан се реализира по строго утврдени заштитни мерки. Минатата година како тим покажавме дека можеме да се справиме со сите предизвици и да се заштитиме од сите опасности што ги носи пандемијата. Тоа нè направи годинава да сме уште повеќе подготвени и поискусни за реализација на претстојните 40 фестивалски вечери, истакна на прес-конференција во Охрид директорката на Фестивалот, Наташа Поповиќ.
Свеченото отворање на фестивалот ќе биде во знакот на Чајковски, со делови на балетската трилогија „Лебедово езеро“, „Оревокршачка“ и „Заспаната убавица“, извадоци од балетот „Ана Каренина“ и операта „Евгениј Онегин“, и сето ова во изведба на Националната опера и балет. Во проектот ќе учествуват над 90 уметници под диригентската палка ја има Бисера Чадловска.
Ќе има вкупно 34 уметнички концерти и многу театарски претстави. Се очекува да допатуваат врвни уметнички имиња како Александар Штаркман, Ѓуљсин Онај, Вихан квартет, Ирина Графенауер, Мате Бекавац, Кирил Родин, Жени Захариева, Маја Богданович, Даниел Родан, Стојан Димов и Дино Имери, Дарко Костовски, Васко Дантас и многу други.
Во делот на таканаречената слободна програма се двата проекти „ЗЗ квартет“ и „Сви марш на плес“. Случувањата ќе се реализираат на три сцени во Античкиот театар, во Црквата „ Света Софија“ и Долни Сарај.