Во последната студија на службите на Европската комисија е пресметано дека земјите членки на ЕУ во просек изгубиле 134 милијарди евра по основ на приходи од ДДВ во 2019 година поради „фискална оптимизација“. Поради фискална евазија, но и административни грешки при пресметки што ги чинат земјите членки значајни приходи, Европската комисија бара таргетирани и ефикасни политики за да се одговори на оваа појава.
За Европската Комисија изгубените приходи од ДДВ имаат „екстремно негативни последици“ врз капацитетот на владите да инвестираат во јавните добра како образование, здравство и транспорт, посебно во контекст на економската криза предизвикана од пандемијата, како и климатската криза.
Бројките за 2019 година значат дека во ЕУ се губеле 4.000 евра во ДДВ секоја секунда, предупреди еврокомесарот за економија, Паоло Џентилони.
Сепак, ситуацијата е подобра отколку претходните години, истакнува европската извршна власт. Најголем јаз во ДДВ има во Романија со 34,9 отсто, потоа Грција со 25,8 отсто и Малта со 23,5 отсто. Најдобри резултати покажуваат Хрватска со 1 отсто, Шведска со 1,4 отсто и Кипар со 2,7 отсто.