Директорот на Агенцијата за млади и спорт, Дарко Каевски денеска на прес-конференција соопшти дека ќе биде формирана комисија за утврдување одговорност за членовите на стручната комисија ангажирана за селекција и избор за најдобри авторски дела од конкурсот за проектот „Млади поети“, а ќе биде поведена и дисциплинска одговорност и суспензија на раководителот на Секторот млади.
Ова, како што рече Каевски, се мерките што ќе ги преземе АМС за расветлување на случајот со двете песни со недолична содржина кои беа објавени во збирката, а кои предизвикаа големо внимание во јавноста.
„Утврдивме дека постоело несовесно, нестручно, непрофесионално работење на неколку чинители кои имале активна улога околу конкурсот за издавањето на публикацијата на „Млади поети“. Таквото однесување довело до објавување на содржина која содржи елементи на родова и ентичка дискриминација на што АМС жестоко се противи, рече Каевски.
Каевски и денеска повтори дека надворешната тричлена комисија составена од Јовица Иванов како претседател и Николина Андова Шопова и Тихомир Јанчоски имала обврска да изврши селекција на пристигнатите творби, иако членовите на комисијата деновиве изјавија дека нивна задача била само да одберат три најдобри песни.
Каевски изјави дека чувствува морална, но не и друг вид одговорност за објавување на збирката. Одговорноста за направениот избор и за содржината на збирката ја лоцира кај членовите на надворешната комисија, но и кај раководителот на секторот кој ќе биде суспендиран и кој ја доставил збирката до Арс Ламина.
Тој, исто така вели дека во случајот постојат и видливи прекршувања на законски одредби од Законот за издавачка дејност.
„Како директор не сум дал никаква писмена и усмена согласност да бидам уредник, а притоа АМС неможе да биде издавач на збирката поезија „Млади поети“ , а овластеното лице неможе да биде уредник за истата имајќи ги предвид нормите во Законот за издавачка дејност“, рече Каевски.
Овој проект се спроведува четири години, а оваа година првпат тој како директор и Агенцијата биле наведени како уредник и издавач. Претходните години тоа не било случај. Тој нагласи дека не дал согласност да биде уредник, а како тоа се случило дополнително ќе се утврди.
Арс Ламина го добила тендерот за „Млади поети“ кој првично изнесувал 400 илјади денари, а потоа со наддавање го добила за околу 180 илјади денари, за печатење и дистрибуција.
Збирката е испечатена во 5.000 примероци, а АМС нема точна бројка колку досега се дистрибуирани.
За објавувањето на двете песни под лажен идентитет, Каевски изјави дека МВР веќе презело иницијатива за расчистување на случајот.
Александар Блажевски од Ресен, конкурираше на огласот за млади автори на Агенцијата за млади и спорт користејќи го името на својот студент Даниел Пиљаковски.