Радикалното талибанско движење даде рок од четири часа на единиците на отпорот во авганистанската провинција Паншир да ја пренесат контролата врз талибанците, јави денеска ТВ каналот „Ал Арабија“.
Според телевизијата, радикалите „му дадоа четири часа на Ахмад Масуд (водачот на отпорот против талибанците) да ја префрли провинцијата Паншир под контрола на талибанците. Се истакнува дека единици на талибанците се во состојба на целосна подготвеност за да започнат операција за заземање на провинцијата“.
Во исто време, според катарскиот телевизиски канал „Ал Џезира“, талибанците имаат намера да испратат делегација на средба со Масуд во блиска иднина. Членовите на делегацијата на движењето ќе разговараат за „ситуацијата во Паншир и ќе дадат гаранции за исполнување на барањата на Масуд“.
Извор во северната провинција Паншир вчера за агенцијата ТАСС изјави дека започнале разговори меѓу Масуд и талибанците. Според изворот, се работи на создавање инклузивна влада и надминување на политичките поделби. Сè уште нема податоци за резултатите од преговорите.
На 18 август, извор на ТАСС во провинцијата Паншир соопшти дека во регионот се формираат групи за отпор против талибанците кои ја презедоа власта во Авганистан. Вкупниот број на формации може да достигне неколку илјади луѓе.
Претходно, проиранскиот телевизиски канал „Ал-Алам“, кој емитува од Бејрут, објави дека вооружените сили лојални на поранешниот потпретседател на Републиката, Амрула Салех, веќе го окупирале регионот Чарикар во провинцијата Парван, од каде ги потиснале талибанците. Лидерот на Националното исламско движење, маршал Абдул-Рашид Достум, испратил 10.000 војници во клисурата Паншир.
Покрај тоа, Ахмад Масуд, син на некогаш влијателниот водач на таџикистанската заедница во Авганистан, Ахмад Шах Масуд (1953-2001), во писмо објавено на 16 август во француско списание најави организирање отпор против талибанците, чиј центар ќе биде Паншир.