Две големи откажувања за две големи тениски разочарувања. Серена Вилијамс го откажа учеството на Мастерсот турнирот од категоријата Премиер во Мадрид, а Енди Мареј, сепак, нема да заигра на вториот гренслем во сезоната, Ролан Гарос.

Американката оваа година се врати во ВТА турот по долгата пауза што ја имаше поради породувањето, но реши да направи нова по настапот во Мајами каде се соочи со елиминација уште во првото коло. Како причина ја наведе потребата од повеќе време за кам-бек на посакуваното, препознатливо ниво.

„Жалиме за отсуството на Серена и ` посакуваме што поскоро опоравување. Таа е еден од најголемите шампиони во нашиот спорт и секогаш правеше вистинска забава на турнирот. Се надеваме дека ќе имаме прилика да ја видиме во „Магичната кутија“ наскоро“, истакна легендарниот Маноло Сантана, директор на турнирот во Мадрид што оваа година ќе се игра за награден фонд од 6,685,828 милиони долари.

Енди Мареј, поранешен светски рекет број еден кај мажите, пак, сè уште се рехабилитира од операцијата на колкот. Враќањето на тениските терени во неговиот план беше зацртано за крајот на мај, поточно, за Ролан Гарос, но најголемиот турнир на земјена подлога овојпат ќе мине без британскиот ас. Тој ги извести организаторите во Париз дека не е во можност да настапи на годинашното издание, а како што стојат работите се очекува да се врати на терен во дело од тениската сезона на трева.