Енди Мареј, сепак, го пропушта годинашото издание на Ју-Ес опен што стартува во понеделник поради, како што и самиот наведе, повреда на колкот. Вториот светски рекет пристигна во Њујорк на почеток на работната недела и се надеваше дека ќе биде во можност да заигра на Флешинг Медоу, но болките што му создаваат непријатност го принудија да донесе одлука за повлекување.
Британецот е отсутен од АТП турот по Вимблдон. Во меѓувреме не учествуваше и на двата последни Мастерса во Монтреал и во Синсинати и се подреди на Ју-Ес опен. Агенцијата „Асошиејтед прес“ го окарактеризира потегот на Мареј како изненадувачки и наведе дека тој едвај зборувал на прес-конференцијата во Њујорк.
Најдобриот тенисер за 2016 година истакнал дека „болките се пресилни да може да го освои турнирот“. Притоа порачал дека во наредните неколку денови ќе донесе одлука за евентуален крај на сезоната.
Учеството на машкиот дел од турнирот претходно го откажаа и Новак Ѓоковиќ, Стен Вавринка, Кеи Нишикори и Милош Раониќ. Па, како главни фаворити за титулата, особено по повлекувањето на Србинот и на Британецот, преостануваат Рафаел Надал и Роџер Федерер.