Францускиот тениски судија Арно Габа беше подложен на операција на левото око во Тулуз. Зафатот, сепак, беше неизбежен по дополнителните лекарски прегледи во неговата родна земја. Утврдено е дека нема оштетувања на рожницата и на мрежницата, но рентген снимките покажале фрактура на коската над левото око. Постоперативните прогнози се добри се очекува негово враќање на професионалните обврски за еден месец.
Габа настрада минатиот викенд во Отава за време на натпреварот во Дејвис купот – Светска група меѓу Канада и Велика Британија. Исфрустриран од една неизнудена грешка Денис Шаповалов истури бес на едно од топчињата по кое замавна со сета сила и со намера да ги испрати високо на трибините. Но, притоа, несакајќи го погоди несреќниот судија на стол. Мечот беше прекинат, 17 годишниот тенисер дисквалификуван, а Канаѓаните елиминирани од натпреварувањето. Шаповалов подоцна беше и парично казнет од ИТФ (Интернациоална тениска федерација) со 7.000 долари за непримерниот потег.
„Габа е пуштен на домашно лекување. Неговата состојба е добра. Докторите му препорачаа одмор и рехабилитација на неодреден период“ пишува во соопштението на ИТФ.