Стечајниот суд во Лондон прогласи банкрот за Борис Бекер. Изрекувањето на мерката дојде како последица на одбиеното барањето на неговиот адвокатски тим за добивање на нова шанса за подмирување на долгогодишниот долг.
Како што пренесува агенцијата „Асошиејтед прес“, судијката Кристина Дерет одбила да даде дополнителни 28 дена за легендарниот германски тенисер за покривање на обврските кон приватната банка „Арбутнот Лејтам“ за долг од четири милиони евра од 2015 година.
„Во 11.23 часот прогласив банкрот. Стекнав впечаток дека тоа е човек што ја зарил главата во песок“, изјави судијката Дерет која, како што наведе, при носење на одлуката се присетила и на неговите одлични партии на Вимблдон, но немала доволно докази дека неговите доспеани обврски ќе бидат „испеглани“ во блиска иднина.
Правнитот тим на Бекер понуди опција за рефинансирање на аранжманот како и хипотека на сопственост на недвижнини на Мајорка како еден од начините за прибавување на шест милиони евра. Но, таквиот предлог е одбиен во Стечајниот суд Лондон од каде истакнаа и дека очекуваат од шпанската банка да овозможи располагање со тие пари во рок од еден месец.
Бекер (49) моментно живее во Лондон и по разделбата со Новак Ѓоковиќ работи како коментатор на „Евроспорт“. Германецот се наоѓа на петтото место на вечната листа на тенисери според заработувачка од настапи на турнирите. Во кариерата инкасира преку 110 милиони евра, факт што дополнително зачудува за неговиот банкрот.