Едсон Нарантес до Насименто или попознат како Пеле (76) ги преживува едни од најтешките моменти во животот. Синот на легендарниот бразилски фудбалер доби потврда на затворската казна во времетраење од 12 години и 10 месеци за перење пари за нарко мафијата.
Едињо (46) се предаде на полицијата по пресудата на жалбениот суд дека ќе мора зад решетки на речиси 13 години за нелегални трансакции на финансии заработени од трговија со дрога. Во јуни во 2014 година тој беше осуден на 33 години затвор. Притоа ги негираше обвинувањата дека тргувал со дрога иако призна дека е зависник. Неговите адвокати поднесоа жалба што беше делумно прифатена, па казната е намалена на 12 години и 10 месеци.
„Лут сум и фрустриран. Требаше да ме ослободат бидејќи сум невин. Осуден сум за перење пари, а немаат ниту еден доказ против мене. Единствен аргумент за одлуката се моите познанства со некои од осудените за што никогаш и не криев“, призна Едињо чие целосно име е Едсон Шолби до Насименто.
Во случајот се осудени уште четири лица меѓу кои и Роналдо Даурте Барсоти, кој важи за крал на дрогата, на 33 години затвор.
Едињо е поранешен фудбалер кој во последните години работеше како тренер на голманите во Сантош, клуб во кој се прослави неговиот татко. Син е на Пеле од првиот брак од кој има и две две сестри. Поранешниот бразилски ас има близнаци од вториот брак (син и ќерка) и уште две ќерки од вонбрачни врски.