Published: Friday, March 13, 2020 12:02
Македонските државјани во Италија, како што велат, ги преживуваат најтешките моменти од престојот на Апенините, откако коронавирусот ги загрози животите на десетици илјади граѓани, а околу 1.000 лица починаа. Семејство од Делчево кое е во Северна Италија за МИА раскажува дека 24 часовниот режим на изолација тешко се поднесува. Во местото каде живеат починал 51 годишен ветеринар, додека ситуацијата е најлоша во Ломбардија, Милано, Пиемонте, а почнува да се влошува и во Венето.
„Тука веќе има мртви од вирусот, во Изола д’Асти почина ветеринар на 51 година. Во моментот имаме забрана за излегување од дома без потреба, освен за итни работи. Освен продавниците, не работат баровите, пицериите, рестораните. Забранета е комуникација со лица, застанување и шетање без причина. Забранети се сите јавни собири“, велат дел од Македонците кои живеат во тој дел на Италија.
Тешкиот карантин, како што додаваат, трае 24 часа, секој мора да биде дома, за да не се шири и пренесува коронавирусот.
„Посебно е хаос во Северна Ломбардија и Пиемонте, а ситуација почнува да се влошува и во Венето. Училиштата, градинките и факултетите не работат. На секои две минути на телевизијата повторуваат – „седете дома, не излегувајте без потреба и мијте раце со сапун и вода“. Има големи редици во супермаркетите, се влегува еден по еден, откако едниот купувач ќе излезе. Има продукти, рафтовите брзо се празнат, но брзо се врши дотур на роба. Карабинери шетаат по улиците нон-стоп со автомобили, додава делчевското семејство кое е во самоизолација.
Меѓу останатите мерки кои се преземаат, велат тие, дека е забрането возење и одење без потреба на работа.
„На работа одат само оние кои имаат документ од фирмата. Во однос на купувањето, можете да одите по цигари, леб и основни продукти за јадење и без задржување и правење муабет на растојание еден од друг на два метри и забраната како што кажа претседателот Конте трае до 3 април“, велат тие.
Како што додаваат Австрија ја затворила границата, исто и железницата не работи, додека Словенија има поставено ѕидови на влезот со Италија.