Лидерката на белоруската опозиција, Светлана Тихановскаја во изјава за агенцијата Ројтерс ги повика Европската Унија (ЕУ), Велика Британија и САД на заеднички притисок врз претседателот на Белорусија, Александар Лукашенко.
Апелот дојде за време на нејзината посета на Варшава во пресрет на Самитот на Г7 што е закажан во Велика Британија и изрази надеж дека на состојбата во Белорусија ќе биде на дневен ред на состанокот. Поранешната советска република се најде во центар на внимание по принудното слетување на авион на „Рајан Ер“ и апсење на белоруски опозициски новинар.
– Притисокот е посилен кога земјите делуваат заедно, па затоа ги повикуваме Европската Унија, САД, Велика Британија и Украина кои мора да делуваат заедно за нивниот глас да биде посилен, изјави Тихановскаја.
Франција сака да упати покана до Белорусија за присуство на Самитот Г7, но под услов ако Велика Британија се сложи на тоа. Британските домаќини, пак, јасно ставија до знаење дека не планираат да повикуваат други делегации, меѓутоа истакнаа дека Белорусија ќе биде една од темите на состанокот.
Британија, САД и ЕУ наметнаа санкции и донесоа одлука за замрзнување на имотот на некои офиуцијални лица од Белорусија по ланските избори за кои опозицијата смета дека биле лажирани. А, поради инцидентот со авионот на „Рајан Ер“, западните земји апелираа со авиокомпаниите да го избегнуваат воздушниот простор на Белорусија и порачаа дека ќе преземат и други мерки како забрана на летови на белоруски превозници.