„Треба да бидеме јасни. Франција ја поддржува Северна Македонија, Франсоа Лафон е експерт кој помага на тој пат и работи во Кабинетот на вицепремиерот за евроинтеграции, Бујар Османи, порача францускиот амбасадор Кристијан Тимоние на отворањето на меѓународната конференција „Од партнерство до членство: Северна Македонија и француско-германската перспектива“ во организација на Европското движење и Фондацијата „Конрад Аденауер“
Тој ја нагласи неопходноста од вистинска, суштинска работа за да се подготви земјата за почеток на преговорите со Европската Унија, што ќе значи внатрешни чекори што треба да се спроведат. Истовремено истакна дека целокупниот товар за реформите не треба да паѓа врз Брисел туку со меѓународна, конкретно француска поддршка, вистинската работа да се заврши овде, со вистинска мобилизација на целото општество.
„Постои едногласна поддршка кај сите политички партии за отворање на преговорите за членство, и кај десницата и кај левицата. Истото барање и јас го добивам секојднево, а тоа е кога ќе ги отвориме преговорите. За нас поглавјата 23 и 24 се јадро на нашата иднина. Во однос на владеењето на правото, постои едногласно размислување во македонското општество и затоа ние овде не зборуваме за дебата, туку за конкретни барања“, посочи Тимоние.
Тој се осврна на француската идеја за Европа и зборуваше за француско-германскиот мотор кој, како што рече, ја влече Унијата напред.
Францускиот амбасадор најави дека утре во Преспа ќе присуствува на одбележувањето на првата годишнината од потпишувањето на Договорот кој, како што рече, носи огромна надеж и го поддржуваме.
Претседателката на Европското движење, Милева Ѓуровска рече дека сега е моментот да се зборува за европските интеграции. Најави дека на коференцијата ќе зборуваат за перспективите на нашата држава во однос на, како што рече, многу блиската перспектива што ја очекуваме.
„Единственото прашање што ние вчера и денес го дискутиравме ќе биде добивањето датум за членство во ЕУ. Но, искрено се надевам дека нема да останеме само на тоа прашање“, рече Ѓуровска.