Амбасадата на Франција денес прецизираше дека заклучоците за Македонија изнесени во „нон пејперот“ не се конечни и дека ставот на Франција ќе биде дефинитивно утврден во договор со нејзините европски партнери во наредниот период пред самитот на ЕУ во Брисел на 28 јуни.

“Амбасадата на Франција појаснува во врска со документот наречен “non-papier” кои го споменуваат одредени медиуми. Амбасадата, исто така, напоменува дека предлозите за отпочнување на преговорите од страна на Комисијата содржани во извештајот за Македонија и за Албанија ќе бидат проучени од страна на Советот (општи работи) на 26 јуни а потоа за нив ќе одлучи Европскиот Совет во текот на истиот месец. Разговорите за подготовка на заклучоците за Македонија и за Албанија се уште не се отпочнати во Брисел. Поради тоа и не треба да му се придава премногу големо значење на тој документ, особено што во него станува збор за точки за кои ќе се разговара и одлучува во иднина”, вели соопштението на амбасадата што го објави Макфакс.

Нацрт нон-пејпер на Франција и Холандија предизвика серија остри реакции во Македонија пред се од најголемата опозициска партија ВМРО-ДПМНЕ.

Дипломатски извори во Советот, каде се преговара и подготвува претстојниот Самит на ЕУ во јуни на кој ќе се одлучува за преговори со Македонија, за МИА изјавија дека ова е веќе позната позиција на Холандија и Франција и не претставува ништо ново. Во ЕУ има и други земји членки кои имаат поинаков став за Македонија.

“Ние сепак сметаме дека преговорите со Македонија треба да се спроведат доколку се реши спорот за името, така што овој документ не не’ загрижува многу”, изјави дипломатски извор од западна земја членка на ЕУ за МИА.

Холандија и посебно Франција се познати по отпорот на нивната јавност кон проширувањето на ЕУ. За преговорите со Македонија, министрите за надворешни работи, амбасадорите, и шефовите на држави и влади на ЕУ ќе дебатираат во текот на овој месец. Клучен услов за старт на преговори е да се пронајде компромис за името со Грција.

Нон-пејперот е неформален документ со кој земјите членки на ЕУ често се служат во подготовката на преговори за некое спорни политички или процедурални прашања што треба да се решат и околу кои има разлики во ставовите. Овој начин на дипломатска комуникација е обид да се испитаат реакциите на другите земји за можните решенија.