Судењето за случајот „Траекторија“ денеска поворно е одложено, бидејќи и по одбиените приговори и по паузата која судијата ја даде за да одлучи за денешните приговори на одбраната кои исто така беа одбиени, адвокатите на обвинетите, но и поранешниот премиер Никола Груевски продолжија да поднесуваат нови приговори.
Иако судот го одби барањето за отфрлање на бомбите и смс пораките како доказ Груевски во своето обраќање до судијата повторно побара смс пораките да не бидат доказ, бидејќи како што вели ваквите електронски записи е лесно да се манипулираат и менуваат со цел да им се стави вина на нив како обвинети.
За Груевски е спорен е и начинот на кој се прибавени смс пораките и изрази сомнеж дека тие може да биле менувани во времето додека биле во сопственост на СДСМ, со цел, како што рече, да им ја урне репутацијата за политички цели.
-Самата технологија на пишување пораки во електронска форма, откако еднаш се сочувани како збир од обични букви, овозможува нивно бришење и додавање букви, нов текст. Може на обичен компјутер со ексел програма, на која можете слободно да ги менувате и да не оставите траг дека тоа сте го направиле, рече Груевски.
Тој дури рече и дека и судот работи под политички притисок на што судијата реагираше и ги замоли обвинетите да не се служат со такви квалификации.
Обвинителката од СЈО Лиле Стефанова рече дека обвинетиот Никола Груевски од мобилниот телефон му чита од збор до збор исти, веќе поднесени приговори, само за и натаму да не почне главната расправа.
Стефанова му се обрати на судот дека приговара на начинот на водење на постапката.
-Се добива впечаток дека истите приговори одбраната може да ги поднесува уште 6 месеци, рече Стефанова.
На денешното рочиште, Груевски побара збор и наведе дека има неколку барања до судијата Горан Бошевски. Додека зборуваше, Груевски неколку пати се закашла, по што една од членовите на судскиот совет донесе чаша со вода која му беше подадена на Груевски.
Меѓу барањата на обвинетиот Груевски се и тоа судот да работи по закон, да не биде под политички притисок и тој како обвинет да имал ист третман како Зоран Заев.
Следното рочиште е закажано за први март.
По денешното рочиште, Груевски изјави дека судството се претвора во политичка гиљотина. Тој наведе дека за сите рочишта против него впечатливо било дека немаат ист третман и дека на секое рочиште се борат за права кои што им следуваат по закон. Друго на што се пожали тој е нееднаквиот третман на судот кон обвинителството, одбраната и обвинетите.
– Кон обвинителите се однесуваат со почит, спокојно, а кон одбрана и обвинетите односот е нервозен, со што судот како да дава до знаење на чија страна е, рече Груевски.
Тој се пошегува дека во судот доаѓа толку често што треба да му дадат канцеларија и плата.