Американскиот претседател Доналд Трамп нема да се сретне со рускиот претседател Владимир Путин на маргините на самитот на Југоисточна Азија во Виетнам, соопшти Белата куќа.
„Во врска со средбата со Путин, никогаш не беше потврдено и нема да има никаква средба“, изјави портпаролката на Белата куќа Сара Сандерс пред слетувањето на авионот на претседателот Трамп во веитнамскиот град Дананг.
Таа сепак не исклучи дека двајцата претседатели би можело да имаат помалку официјална средба во Дананг или подоцна на Филипините каде што ќе учествуваат на друг регионален самит.
Доколку се сретнеа, се очекуваше Трамп и Путин да разговараат на повеќе теми.
Москва би инсистирала на повторно воспоставување на дипломатски и воен дијалог меѓу Москва и Вашингтон, иден стратешки договор за вооружувањето, како и за ракетите со среден дострел. Русија е спремна на разговори и за светските кризни жаришта.
За Трамп пак најважни се три теми: Северна Кореја, Украина и Сирија. И Москва и Вашингтон ги критикуваа најновите атомски тестови на Пјонгјанг, но Русија, заедно со Кина, пледира за дипломатско решение, вклучително и отстапки кон Северна Кореја. Трамп пак се заканува со воен удар. Разлики постојат и во поглед на Украина, на таа тема би било тешко да се постигне пробив.
Важна тема останува и меѓународниот атомски договор со Иран, од кој американскиот претседател се заканува да се повлече. Путин пак неодамна престојуваше во Техеран и демонстрираше блискост со иранското раководство.