Претседателот на САД, Доналд Трамп одлучил да ја укине програмата на Барак Обама преку која се издаваа работни дозволи за мигрантите кои немаат документи, а во САД пристигнале уште како деца, пишува Политико, повикувајќи се на извори блиски до Трамп.
Трамп го презентираше ваквиот став уште во предизборието, иако луѓето внатре во партијата од која доаѓа бараат да не носи одлука за укинување на програмата.
Програмата позната како ДАКА во рацете на администрацијата на Трамп е дискутирана веќе неколку месеци. Сепак администрацијата сака одговорноста да ја префрли на Конгресот, така што во наредните месеци главната битка за укинување или не на програмата ќе се води таму.
Се очекува својот предлог план за укинување на ДАКА, Доналд Трамп да го соопшти во вторник.
Ако го направи тоа, во САД претстои бурна политичка “борба“ ако се знае дека ваквата одлука ќе му ја зацврсти позицијата кај неговите гласачи кои се ЗА во однос на тоа да се зацврстат политиките за миграција и заштита на границите, додека политичкиот естаблишмент ќе опонира на ваквиот предлог кој сигурно ќе го оспори тврдењето дека „САД е земја во која се остваруваат соништата“.
Програмата стапи во сила во 2012 година, поттикната од претседателот Барак Обама, дозволувајќи им на околу 800.000 недокументирани мигранти да останат во земјата со обновливи двогодишни периоди за студирање или работа ако дошле во САД пред 16 години.