Американскиот претседател Доналд Трамп веќе втор ден го “бомбардира” со твитови градоначалникот на Лондон Садик Кан, Британец со пакистанско потекло.
Во неделата Трамп го обвини Кан дека дал несериозна изјава по последниот терористички напад во Лондон. Осудувајќи го нападот, Кан изјави, меѓу другото, дека не треба да се крева паника.
На ова Трамп твитна дека изјавата на Кан е “патетична”:
“Најмалку 7 мртви и 48 ранети во терористички напад а градоначалникот на Лондон вели дека нема потреба од паника”.
На ова одговори портпаролот на Кан велејќи дека градоначалникот е “зафатен со попаметни работи отколку да одговара на лошо информираните твитови кои намерно излегуваат од контекстот на изјавите кои ги повикуваат Лондончаните да не паничат” на Трамп.
Таткото на Лондон со својата изјава мислеше на засиленото присуство на полицијата во градот. А Трамп очигледно разбрал дека Кан не ја зема сериозно терористичката закана во Лондон.
На ова нов твит на Трамп:
“Мораме да престанеме да биде политички коректни и да работиме за безбедноста на нашите. Ако не бидеме итри ова ќе се влоши.”
Денес повторно Трамп го нападна Кан:
“Патетично извинување на градоначалникот на Лондон кој мораше да најде брзо објаснување за својата изјава дека не треба да се крева паника”, твитна Трамп штом се разбуди утринава. И додаде дека традиционалните медиуми напорно работат за да ја “продадат” верзијата на Кан.
Садик Кан е член на Лабуристичката партија.