Заврши трансфер сагата на Филипе Кутињо. Откако одби да патува со екипата на Ливерпул во Дубаи на мини-подготовки за мечот со Манчестер сити во Премиерлигата, Бразилецот потпиша пет и пол годишен договор со Барселона за 160 милиони евра што го прават трет најскап фудбалер на сите времиња. Рекордот засега го држи Нејмар за кого ПСЖ летоска издвои 222 милиони евра. И вториот трансфер по вредност е на „светците“ од Париз кои го ангажираа Килијан Мбапе од Монако за 180 милиони евра.
При објавување на веста за успешно завршување на зделката, Каталонците истакнаа и дел од личните финансиски детаљи на бразилскиот интернационалец. Откупната клаузула во договорот е со сума од 400 милиони евра, а годишно ќе инкасира по 14 милиони евра, па произлегува дека само Лионел Меси ќе биде поплатен од него на „Камп Ноу“.
Кутињо беше блиску до трансфер во Барселона и во летниот преоден рок, но Ливерпул ги одбиваше понудите на Каталонците. Управата и стручниот штаб овојпат беа немоќни да спречат заминување на напаѓачот кој на „Енфилд“ мина пет години. Претходно играше за Васко да Гама, за Еспањол и за Интер.
Клоп: Не можевме ништо да сториме, негов детски сон е да заигра за Барселона
Ливерпул се надеваше дека ќе успее да го задржи Кутињо барем до крајот на сезоната. Но, Барселона беше конкретна и упорна и испрати понуда што тешко се отфрлаше. Го призна тоа и Јирген Клоп во огласувањето по трансферот на Бразилецот кого го нарече „одличен фудбалер, добар пријател и прекрасна личност“.
„Не е никаква тајна дека сакаше да се пресели во Шпанијаа уште летоска кога Барселона за првпат искажа интерес. Беше упорен во желбата во разговорите со мене, со соиграчите и со управата на клубот. Во таква ситуација не можете ништо да сторите“, изјави Клоп за официјалната интернет страница на Ливерпул.
Новонастанатата ситуација налага потреба од ангажман на Ливерпул во потрагата по замена за Кутињо. Медиумите во Англија веќе почнаа со шпекулациите дека на место на Бразилецот на „Енфилд“ би можеле да пристигнат Томас Лемар од Монако или Ријад Марез од Лестер.
„Ливерпул стори се што можеше да го задржи Кутињо. Но, негов сон од детството е да заигра за Барселона и не само негов туку и на целата негова фамилија. Нам ни останува да се бориме и да не дозволиме ова да влијае врз екипата“, им порача германскиот менаџер на клупските фанови.
По 22 кола во Премирлигата, Ливерпул е на четвртото место на табелата со 44 бода, 18 помалку од Манчестер сити на лидерската позиција.