Меѓу жртвите кои се извлечени од урнатините на погодениот локал се наоѓаат и три деца, соопштија краматорските власти денеска утрото. Две од децата биле родени во 2008 година а едното во 2011 година. Во нападот се ранети најмалку 56 луѓе.
Првичните информации, соопштени синоќа по ударот на ракетата, беа дека загинале 3 лица, а повеќе од 40 се повредени.
Спасувачките екипи морале претходно да ги расчистуваат урнатините во потрага по преживеани во ресторанот во центарот на градот.
Украинскиот претседател Володимир Зеленски овој нов напад врз градот Краматорск во својата вечерна видео порака синоќа го осуди најостро и рече дека тоа е уште едно воено злосторство.
„Ваквиот терор за нас и за целиот свет е уште еден доказ дека Русија за своите дела заслужува само едно: пораз и изведување пред судот на правдата“, рече тој.
Претходно и украинскиот министер за внатрешни работи Ихор Клименко соопшти дека руската армија во два наврати во вторникот вечерта го ракетирала Краматорск и меѓу другото е погоден и еден ресторан.
Во агресорската војна која Русија веќе подолго од 16 месеци ја води против Украина, без оглед на официјалните тврдења од Москва, постојано се вршат напади со ракети и дронови врз украинските станбени области во кои чести жртви и повредени се цивили.
извор: Дојче Веле