Сите 24 меча што Шкендија ги одигра во Европа во изминатите три години, паднаа во вода по само два ова лето. Тежината на сите три пласмани во плејофот за Лига Европа во 2016 година, во 2017 година и во 2018 година, се поништени во ова лето. Елиминациите на екипи од калиброт на Краковија, на Нефчи, на Млада Болеслав, на Дачија, на Хелсинки, на Тракаи, на ТНС и на Шериф, моментите за уживање против Гент, против Милан, против Салцбург и против Розенборг, се обезвреднети.
Македонскиот фудбалски шампион е експресно елиминиран во квалификациите за двете натпреварувања на УЕФА за сезонмата 2019/20. Како да беше малку бламажата од естонски Номе Калју во воведната рунда за Лигата на шампиони, па како капак дојде Диделанж. Тимот од Луксембург одигра 1:1 против тетовци и на својот стадион „Жоси Бартел“ и благодарение на триумфот со 2:1 на арената „Тоше Проески“ ги закопа „црвено-црните“ во, веројатно, најочајните меѓународни изданија во нивната клупска историја. Делгадо погоди за домашните во 78. минута, Агим Ибраими израмни во 90’+2’ минута.
Немоќта на тетовци се преточи во тешка фрустрација на гостувањето во Луксембург за што говорат и трите исклучувања, па тимот на Ќатип Османи го заврши мечот со седум фудбалери во поле. Висар Муслиу во 85. минута по вторпат пожолте, а директни црвени картони добија Валмир Нафиу и Агим Ибраими во судиското надополнување на средбата.
На мегдан на Номе Калју во третото квалификациско коло за Лига Европа ќе оди Диделанж додека Шкендија ќе може на раат да се подготвува за стартот на новата сезона во домашното првенство и дуелот со Академија Пандев во првото коло. И, секако, да размислува што се случи со овој европски излез што требаше да биде континуитет на претходните сезони, а заврши екскурзијантски.