Оливие Жиру е авторот на првиот хет-трик на фудбалската репрезентација на Франција во последните 17 години. Напаѓачот на Арсенал го постигна во убедливата победа на „триколорите“ над Парагвај (5:0) во пријателски натпревар во Рен.
Во листата на стрелци се впиша во 6 минута, во 13. и во 69. по асистенции на тројца различни соиграчи во националниот тим. Првиот го прослави по додавање на Осман Дембеле, при вториот доби топка од Дмитри Паје, а заслуга за третиот имаше Лукас Дињ. Мрежата на Силва до крај ја тресеа уште Муса Сисоко во 76 минута и Антоан Гризан во 77 минута.
Селекторот Дидие Дешамп не можеше да смета на репрезентативците од Јувентус и од Реал Мадрид кои вечерва ќе играат во финалето во Лигата на шампиони во Кардиф. Но, и она што го изведе на теренот беше силно за јужноамериканскиот противник. Со Погба и Матуиди како последни играчи за врска, со триото Паје, Гризман и Дембеле пред нив и со Жиру во шпицот на нападот, Парагвајците беа тотално разбиени на што упатува и резултатот.
Мечот против Парагвај ќе остане во паметење и на Уго Лори. Голманот на Тотенхем го забележа 88 настап и го надмина досегашниот рекордер меѓу стативите, Фабијан Бартез. Генерално гледано, пак, рекордер по бројот на одиграни натпревари за Франција е Лилијан Турам со 142.
Пријателски натпревари (2 јуни)
Франција – Парагвај 5:0
Северна Ирска – Нов Зеланд 1:0
Оман – Сирија 1:1