Иран во фотофиниш го совлада Мароко со 1:0 во воведниот меч на групата Б на Светското фудбалско првенство во Русија. Составот на Карлос Квеирош ги архивира трите големи бода во петтата минута од екстра времето во која во трагичар се претвори Азиз Бухадуж.
Играчот на Сент Паули влезе во игра во 76 минута со цел за освежување меѓу Мароканците, но и да направи разлика во обидот за евентуална победа или, пак, во најмала рака да придонесе за одржување на нулите на семафорот. И ја направи, несакајќи, на штета на сопствената репрезентација. Постигна ефектен автогол по нафрлувањето и, речиси, ги закопа надежите на африканскиот претставник дека би можел да се надева на осминафинале.
https://www.youtube.com/watch?v=NR2GvYtYlcA
Мароко – Иран 0:1 (0:0)
Стадион „Крестовски“ во Санкт Петербург. Гледачи: 62.548. Гл. судија: Чинејт Чакир. Асистенти: Бахатин Дуран и Тарик Онгун (сите тројца од Турција). Ж. картони: Ел Ахмади (Мароко); Шоајеи, Јаханбакш, Ансарифард (Иран). Стрелец: Бухадуж 90’+5’ (автогол) за Иран.
Мароко (формација 3-4-3): Ел Каџуи – Хакими, Бенатија, Саис – Бусуфа, Зијах, Харит (Да Коста 82’) – Н. Амрабат (С. Амрабат 76’), Ел Кааби (Бухадуж 76’), Белханда. Селектор Арв Ренар.
Иран (формација 3-4-3): Беиранванд – Пуралиганџи, Чешми, Рамин – Шоајеи, Хаџи Сафи, Омид, Ансарифард – Амири, Азмун, Јаканбакш. Селектор Карлос Квеирош.