Грчкиот премиер Алексис Ципрас и лидерот на Нова демократија Киријакос Мицотакис жестоко дебатираа во Парламентот во врска со спорот за името, при што Мицотакис ја обвинил Владата дека нема една и заедничка позиција за името, додека пак Алексис Ципрас, возврати дека Нова демократија отстапила од националната линија и уште еднаш ги повтори грчките позиции во разговорите.
– Уште од прв момент ви рековме, зошто влегувате во овој разговор кога го немате обезбедено минималниот неопходен предуслов за да има заемно прифатливо решение, а тоа е промена на Уставот. Прво ни се потсмевавте, а потоа дојдовте на нашата линија. За сега, да излезе господинот Заев со огромна храброст да побара промена на грчкиот Устав, како одговор на тоа што ние му го кажавме, рече Мицотакис, по што следеше аплауз од неговите сопартијци од Нова демократија, пренесува МИА.
Мицотакис исто така го критикувал Ципрас и поради тоа што во разговорите воопшто не ги вклучил и партиите од опозицијата, туку прво се сретал со, како што го нарече „скопскиот премиер“.
– Од прв момент ако сакавте можевте да ги вклучите и опозициските партии, но не го сторивте тоа. Прво разговаравте со скопскиот премиер, а потоа разговаравте со опозициските партии. Свесно го поделивте грчкиот народ, ги обвинивте и сите наши сонародници кои протестираа поради нивни причини, поради чувствителноста околу прашањето на Македонија, речиси сите ги карактеризиравте како ултра националисти, како фашисти, ги претставивте како толпа, изјавил Мицотакис.
Ципрас одговорил дека уште пред средбата со Заев грчките позиции биле јасни, а како пример за разговори на премиерско ниво, без претходно да биде известена опозицијата, ги спомена средбите на Груевски и Папандреу пред осум години.
– Ме обвинувате дека прво се сретнав со премиерот на Скопје, а потоа се сретнав со лидерите на политичките партии. Не разбирам зошто ме обвинувате за ова. Господинот Папандреу, ако не десетици, имаше сигурно 6-7 неформални средби, и мојата беше неформална. Имаше средби со премиер на Скопје, со премиер на поранешната југословенска Република Македонија кој што не сакаше решение и за тоа не извести ниту еден политички лидер. Ни јас не донесов решение, ако немав новости да ви пренесам, немаше да има никаква смисла нашата средба, му одговорил Ципрас на Мицотакис.
Како што пренесува МИА дел од дебатата, лидерот на опозицијата, уште еднаш ја обвинил Владата на Ципрас дека настапува со две позиции, бидејќи коалицискиот партнер Независни Грци не се согласува со официјалниот став.
– Кога министерот за национална одбрана заедно со министерот за надворешни работи, ќе се најде заедно со вас на следниот НАТО Самит и ќе седат еден до друг, кој ќе ја изрази официјалната позиција на Република Грција? Вистината господине Ципрас, е дека денес кога разговарате со скопскиот премиер не разговарате како лидер на парламентарното мнозинство, туку како лидер на СИРИЗА, рекол Мицотакис.
Ципрас од собраниската говорница уште еднаш ги повторил позициите на грчката влада во преговорите: сложено име, ерга омнес – за надворешна и за внатрешна употреба, односно промена и на уставното име.