Грција го отфрли предлогот на Турција за размeна на затвореници со кој од Грција се бараше да ги предаде на Анкара осумте турски војници кои пребегаа по обидот за државен удар, а Турција да ги ослободи двајцата грчки војници.
Реториката меѓу соседите се заостри откако двајца грчки војници беа уапсени од страна на Турција.
Грчките војници беа уапсени во март по преминувањето на границата меѓу двете земји и се соочуваат со обвиненија за илегален влез во Турција.
Осумте турски командоси, кои со хелихоптер ја напуштија Турција по неуспешниот обид за државен удар во јули 2016 година бараат азил во Грција. Турција вели дека биле вклучени во пучот и бараат да бидат вратени за да се соочат со судење.
“Во врска со барањето за размена, а поврзано со грчките војници и други прашања, уште еднаш истакнуваме дека е неприфатливо и е одбиено”, рече грчкиот премиер Алексис Ципрас.
“Позицијата на Грција и на ЕУ во целост е јасна и конзистентна: ние бараме итно ослободување на двајцата грчки војници без услови”, додаде тој.
Во интервју во саботата Ердоган понуди можност тие да ги ослободат грчките војници ако Грција ги врати осумте турски командоси. Ердоган рече дека за ова прашање се разговарало и на Самитот на ЕУ што се одржа во Софија во март годинава.
Грчките судови во неколку наврати ги отфрлија турските барања за екстрадиција на групата. Дел од војниците се во заштитен притвор. Турција вели дека Грција е рај за нејзините непријатели.
Турција и Грција не се согласуваат и околу прашањата за воздушниот простор над Егејското Море и за етнички поделениот остров Кипар.