Верувам дека имаме поминато голем дел од патот, но има уште пат да се помине, рече грчкиот премиер Алексис Ципрас на прес конференцијата во Софија и додаде дека се уште не сме во позиција да говориме за договор.

„Ги разгледуваме чекор по чекор сите детали. Не сме, се уште не сме во позиција да говориме за договор. Ќе постојат и следни чекори. Заедничка цел е да имаме резултат пред Самитот на крајот од јуни и неколку дена пред самитот на европските министри за надворешни работи “, рече Ципрас на прес конференција во Софија, а пренесе Катимерини.

Тој, исто така, кажа дека целта е да се постигне договор кој може ќе биде одржлив.Што се однесува до тоа дали името за кое се преговара е Горна Македонија, Ципрас кажа  дека постојат голем број на предлози, некои алтернативни, но ништо не е  конечно договорено.

Македонскиот и грчкиот премиер Заев и Ципрас имаа  денеска средба во Софија, на Самитот ЕУ – Западен Балкан. Премиерот Заев рече оти со Ципрас суштествено разговарале за неколку опции, при што утврдиле една опција, која може да биде прифатлива за двете страни. Продолжуваат консултации на домашен терен во двете земји.

И германската канцеларка Меркел, на прес конференција во Софија кажа дека двајцата премиери ја информирале дека има напредок во разговорите.

„Се радуваме што слушаме дека добро напредуваат разговорите меѓу Македонија и Грција“, порача германската канцеларка Меркел од Софија.

„Обете земји сторија многу во правец на значителен напредок, иако сѐ уште не се на целта”, рече таа.

Таа потврди дека одлуките за евентуално доделување на датум за почеток на преговорите со Македонија и Албанија ќе се носат на следниот самит, на крајот на јуни годинава. Меркел уште еднаш потврди дека иднината на Македонија во тој поглед директно ќе зависи од решението во спорот за името.