Со новите епидемиолошки мерки што ќе стапат во сила од понеделник, во Црна Гора се забрануваат новогодишни прослави, венчавки на отворено и затворено, како и работа на ноќните клубови, изјави министерката за здравство Јелена Боровиниќ Бојовиќ на денешната прес-конференција.
Таа рече дека моментните епидемиолошки мерки не се почитуваат или контролираат и дека класично заклучување не е опција бидејќи фокусот е на вакцинацијата, а Црна Гора има доволно вакцини за да ја имунизира целата земја, Владата усвоила построги мерки за борба против коронавирусот што ќе важи од понеделник до 1 декември.
Министерката рече дека со новите мерки се забранува организирање на новогодишни прослави на отворено – концерти, масовни собири и слично, организирање на свадби на отворено и во затворено, работата на ноќните клубови и на угостителските објекти се ограничува до полноќ, а под забрана подлежи и организација на студентски екскурзии и патувања, приватни прослави и родендени.
Таа рече и дека престојот во куќи и станови се препорачува само на членови на исто домаќинство и потсети дека националниот дигитален сертификат за ковид-19 останува услов за минување на државната граница, за престој во угостителски објекти, за присуство на свадби (ако некој ги планира викендов), за присуство на приредби, на спортски натпревари, итн.
„Владата сè уште ја разгледува можноста од 1 декември да воведе обврска за поседување на nационалниот дигитален сертификат за ковид-19 за целата јавна администрација – здравство, образование, полициска администрација, армија“, рече Боровиниќ Бојовиќ.