Поранешниот југословенски фудбалски репрезентативец, Фарук Хаџибегиќ е назначен за нов селектор на Црна Гора. На работното место во Подгорица го наследува од Љубиша Тумбаковиќ кој доби отказ од тамошната федерација, откако одби да го води националниот тим против Косово во квалификациите за Европското првенство во 2020 година.
Стручњакот од БиХ е петти селектор на Црна Гора по Зоран Филиповиќ, Златко Крањчар, Бранко Брновиќ и до лани Тумбаковиќ. На црногорското фудбалско кормило ќе дебитира на 5 септември во пријателски меч против Унгарија на домашен терен. Ова е второ негово репрезентативно искуство во менаџерската кариера, откако во 1999 година му беше доверен и А тимот на БиХ.
Според медиумите во Црна Гора, соработката е договорена до крајот на 2020 година и во Хаџибегиќ се полагаат надежи дека ќе успее да го подигне тимот по славиот вовед во циклусот за ЕП 2020. Афирмација во фудбалската кариера доживеа во Сараево, важи за легенда на екипата од „Кошево“ по што направи трансфер во Бетис, а потоа играше и за неколку клубови во Франција.