Фудбалерите на Вардар ќе бидат лидери во домашниот шампионат за време на двонеделната пауза за репрезентативни активности. „Црвено-црното“ дерби во рамки на деветтата прволигашка рунда заврши 0:0, а еден од најзаслужните за освоениот бод на вардарци беше голманот Филип Гачевски кој не дозволи да биде совладан по нападите и заканите на тетовци.
Со ремито под Шара, Вардар го задржа првото место на табелата, но сега со два бода повеќе од Академија Пандев на втората позиција. Струмичани на стадионот „Младост“ ја оправдаа фаворитската улога во дуелот со Силекс и славеа со 2:0. Резулатот го отвори репрезентативецот Љупче Дориев во 38. минута, трите бода ги потврди Ѓорѓи Стоилов по ударот од белата точка во 70. минута.
Најефикасно беше на стадионот „Зоран Паунов“ во Велес каде Борец ја совлада Струга Трим Лум со 3:2. Христијан Драгарски во 29. минута, Симеон Христов во 41. минута и Никола Прелчец во 57. минута се погрижија за втора победа за велешани во сезоната, двоен стрелец за гостинската екипа беше Христијан Кировски во 5. и во 42. минута.
Со идентичен исход како во Тетово (0:0) заврши и пресметката меѓу Македонија и Шкупи во Ѓорче Петров, а Работнички со автоголот на Ненад Мишковски, вчера попладне, освои три бода во натпреварот со Ренова.
Прва лига, 9 коло
Шкендија – Вардар 0:0
Академија Пандев – Силекс 2:0
Македонија Ѓ.П. – Шкупи 0:0
Борец – Струга Трим Лум 3:2
Работнички – Ренова 1:0
Табела: Вардар 20, Академија Пандев 18, Македонија Ѓорче Петров 15, Шкупи 13, Ренова 13, Шкендија 11, Работнички 10, Силекс 9, Струга Трим Лум 8, Борец 8.