Со огномет, знамиња и портрети на претседателот Реџеп Таип Ердоган започна славењето во Истанбул по добиените резултати од референдумот на кој 51 отсто од граѓаните гласаа за уставните измени кои ги предложи претседателот.
Ердоган прогласи победа и изјави дека резултатот е јасен. Тој ги повика премиерот и лидерот на Националистичката партија да им честита на исходот.
Од преброените 98 отсто од гласовите, Ердоган со тесна победа станува единствениот владетел во Турција. 51, 3 отсто од гласачите, гласаа „за“ додека 45 отсто кои гласаа против новите уставни измени, кои ќе му овозможат да остане на функцијата до 2029 година. Вкупната излезност на референдумот била 86 отсто.
ОПОЗИЦИЈАТА БАРА ПРЕБРОЈУВАЊЕ НА РЕЗУЛТАТИТЕ
Главната опозициска Републиканска народна партија бара повторно пребројување на најголем дел од гласовите. Тврдат дека за време на пребројувањето имало многу неправилности, односно најголем дел од гласачките ливчиња се со неважечки печати.
„До сега, спорни се 2,5 милиони гласови. Речиси 6о отсто од избирачките места имаат проблем. Неважечки се повеќе од еден милион гласови. Знаеме како да се справиме со неважечките гласови“, вели Ердал Аксунгер, потпретседател на опозициската Републиканска Народна Партија.
Изборната комисија на својот сајт неколку часа пред затворањето на избирачките места соопшти дека ќе прифати и ливчиња без официјални печати освен ако може да се докаже дека се фалсификат.
ИСТАНБУЛ И АНКАРА ПРОТИВ УСТАВНИТЕ ПРОМЕНИ
Жителите на централните делови од Турција во најголем дел гласаа за уставните измени, додека против беа гласачите кои живеат околу Егејското Море и југоистокот, кој е населен со Курди.
Во Истанбул, дури 51отсто од гласачите не сакаат уставни измени, додека во главниот град Анкара против гласале 50,56 отсто од избирачите.
ШТО ЌЕ СМЕНИ НОВИОТ УСТАВ?
Измените на Уставот, ќе му овозможат на Ердоган да именува и менува министри, да се кандидира уште два пати за претседател и повторно да го преземе водството над својата партија. Најави дека ќе го преиспита и договорот со ЕУ во врска со мигрантите, по референдумот.
Аналитичарите на германскиот Маршал фонд во Анкара, велат дека кампањата за референдумот не била ни фер ни слободна. Владата користела државни пари, биле заплашувани граѓанските организации и медиумите не биле балансирани.
„Предложениот систем ќе води во концентрирање на моќта во рацете на претседателот со многу малку рамнотежа. Претседателот ќе ја има сета извршна власт и власт врз законодавната и судската власт“, вели Маршал фонд.