Министерството за надворешни работи на Турција ја критикува ЕУ, бидејќи, како што се наведува, застанала на страната на Холандија во дипломатскиот спор што настана откако на турксите министри не им беше дозволено во Ротердам да учествуваат на собирот за поддршка на референдумот за поголеми овластувања за турскиот претседател.

Во соопштението се наведува дека ставот на ЕУ им „дава кредибилитет“ на екстремистите, дека е „кусоглед“ и дека нема никаква вредност за Анкара.

ЕУ, која ја повика Турција да се воздржи од остри изјави, го „игнорира холандското кршење на дипломатските обичаи и права“, се вели во соопштението.

Холандската влада, поради „ризик по јавната безбедност“ во саботата ја повлече дозволата за слетување на авионот на турскиот министер за надворешни работи Мевлут Чавушоглу, кој најави дека во Ротердам ќе присуствува на митинг на поддршка за турскиот рефереднум со кои се зајакнува претседателскиот систем во Турција.

Анкара во понеделникот воведе засилени санкции против Холандија: му забрани на холандскиот амбасадор да се врати во Турција и ги суспендира политичките разговори на високо ниво.