Турскиот министер за внатрешни работи, Сулејман Сојлу, предупреди дека Турција би можела да пушта повеќе од 15.000 бегалци месечно кон Европа.
„Ако сакате можеме да отвориме пат за 15.000 бегалци, кои не ви ги испраќаме секој месец, и да ве оставиме без здив“, изјави Сојлу.
„Морате да имате на ум дека не можете да се впуштате во игри во регионот без да ја земете во обѕир Турција“, додаде министерот.
Сојлу ги критикуваше забраните за митинзи за поддршка на турскиот референдум за проширување на претседателските овластувања кои се воведени во повеќе европски земји, особено во Германија и во Холандија.
Тој порача дека тоа се внатрешни прашања на Турција во кои другите земји не треба да се мешаат.
Министерот ги обвини Холандија и Германија дека се вмешани во демонстрации против турскиот претседател Реџеп Таип Ердоган во јуни 2013 година, во прокурдските протести во октомври 2014, и обидот за пуч на 15 јули 2016 година.
Турција и ЕУ минуваат низ најголемата дипломатска криза во последните неколку години по одбивањето на неколку европски земји да им дозволат на турските дипломати да учествуваат на митинзи на турската дијаспора за поддршка на Ердоган пред референдумот на 16 април.
Ердоган поради неодамнешните тензии со неколку земји членки на ЕУ се закани дека ќе ја суспендира спогодбата со ЕУ за мигрантите од март 2016 година, со која драстично беше сменет нивниот прилив во Европа.