Заев и Мицкоски ги повикаа граѓаните да се вакцинираат.
Лидерите на најголемите политички партии во земајва, на СДСМ Зоран Заев и на ВМРО – ДПМНЕ Христијан Мицкоски во дуелот на Канал 5 дебатираа и за состојбите со Ковид – 19, како и мерките за спречување на ширењето на вирусот.
Лидерот на опозициската партија, Мицкоски, посочи дека на светско ниво земјава е прва на листата на починати пациенти од Ковид – 19, на 100.000 жители, а со тоа, лидерот на ВМРО – ДПМНЕ владата ја оцени како најнеспособна во Европа.
– Пред некој ден имавме повеќе од 40 починати и на никој око не му трепнува за тоа. Кога велевме и кога нудевме мерки, истите тие мерки ги прифаќаа со задоцнување од недела – две откако за жал ќе го загубеа животот неколку десетици наши сограѓани. И уште на почетокот на годината зборував наместо да трчаат по провизии за вакцини, да се обидат да најдат начин како како држава да учествуваме во проект на производство на тие вакцини и да го имунизираме на оној начин населението кое сака да се вакцинира. Тогаш тие наместо да бркаат таков проект, бркаа провизии. И тука е најголемиот проблем. Кога цел свет започнуваше со процесот на вакцинација на крајот од минатата година ние тогаш ги лажевме нашите граѓани, тие ги лажеа нашите сограѓани дека ќе почнела вакцинацијата од јануари, февруари, па потоа им бил крив ковакс системот… за да посериозно започнеме од месец мај, рече Мицкоски.
Премиерот Зоран Заев рече дека 90% од смртните случаи на Ковид – 19 се должат на хроничните заболувања кај самите пациенти, 95% од починатите се постари од 60 години, кои најчесто имале проблем со срцето и васкуларниот систем. А, има и граѓани кои подоцна побарале лекарска помош. Според Заев, власта прави сè во врска со справување со вирусот.
– Тоа што го правиме овде го прават во целиот свет. Не правиме ние нешто поразлично од тоа што светот го прави. Истото го правиме, впрочем консултираме сите кои се нови методи. Секојпат се обезбедиле најновите терапии за граѓаните, никојпат не се штеделе некои средства. Обвинувања за некаки провизии се надвор од секаков памет заради тоа што набавивме вакцини поевтини од било кој просек во државата. Обезбедивме дополнителни вакцинации, ако се работи за рационалноста на трошењето на партите. Сме ги направиле сите можни чекори во моментите час посокоро да се најдат вакцини. Помогнаа пријателите како Србија, прво здравствените работници да ги заштитиме и целиот тој процес го менаџираме транспарентно до крај, рече Заев.
Заев и Мицкоски ги повикаа граѓаните да се вакцинираат.